Dublin - Írland

Upplifðu írska þjóðarstemningu í einni skemmtilegustu borg Evrópu !

Vor í Dublin
Beint leiguflug með Icelandair

Páskaferð 5. - 9.apríl
Brottför á Skírdag og komið heim á Annan í páskum.

Helgarferð 19. - 22.apríl 

Fyrirhugaðar haustferðir:

25. - 29. október
og
1. - 4. nóvember

Dublin í Írlandi er einstök borg sem hefur unnið hug og hjörtu margra Íslendinga í gegnum árin,  enda er varla annað hægt en að hrífast af umhverfinu, menningunni og lífsgleði innfæddra. Frá Íslandi er aðeins tveggja tíma flug til Dublinar og er VITA stolt af því að geta boðið áhugasömum að sækja þessa höfuðborg Írlands heim, sem við fullyrðum að sé í hópi skemmtilegustu borga Evrópu.

Fararstjóri í ferðum VITA til Dublin er Svanhildur Davíðsdóttir. Fáir þekkja Dublin betur en hún, enda hefur hún verið fararstjóri fyrir Íslendinga í Dublin frá árinu 1991.

ATH. Boðið verður upp á skemmtilegar skoðunarferðir um svæðið í ferðinni. Nánari upplýsingar um þær er að finna neðar á þessari síðu.

Dublin er höfuðborg Írlands, sem gjarnan er nefnd „Eyjan græna“ sökum þess að 4/5 hlutar landsins er grænt og landbúnaður hefur mikið vægi. Ef úthverfin eru talin með búa um tvær milljónir manna í Dublin. Borgin liggur við ánna Liffey sem skiptir borginni í norður- og suðurhverfi.

Í Dublin eru vel á annað þúsund barir og krár, þar sem þjóðdrykkirnir Guinness (dökkur bjór), Jameson (viský) og Bailey's (líkkjör) njóta iðulega mestu vinsældanna. Það verður ekki tekið af Írunum að þeir kunna sannarlega að skemmta sér og hin svokallaða „pöbba-stemning“ sem gjarnan myndast er sannarlega ógleymanleg. Segja má að gönguferð í Temple Bar skemmtanahverfinu sé hreinlega upplifun út af fyrir sig, svo mikil er stemningin þar á hverju kvöldi.

Mikið úrval góðra veitingastaða er að finna í Dublin og geta gestir þá valið á milli amerískra, skandinavískra, austurlenska nú eða að sjálfsögðu sér-írskra veitingastaða. Úrvalið er mikið og gæði matseldarinnar eru víðast hvar framúrskarandi.

Í miðborg Dublin er mikið lagt upp úr ólíkum menningarviðburðum þar sem úrvalið og fjölbreytnin er jafnan mest á haustin. Fjölmörg leikhús eru í borginni og auðvelt er að komast á áhugaverða tónleika. Þá njóta danssýningar jafnan mikilla vinsælda á meðal erlendra ferðamanna, ekki síst sýningar þar sem sjálft þjóðarstolti eyjaskeggja er í forgrunni, réttara sagt írski steppdansinn.

Almenningssamgöngur eru góðar, tveggja hæða strætisvagnar eru áberandi og tiltölulega auðvelt er að fá leigubíla. Við mælum þó sérstaklega með því að fólk ferðist á tveimur jafnfljótum - enda er það langsamlega besti fararskjótinn til á að upplifa borgina sem best og drekka í sig menninguna og söguna sem býr í götunum og byggingunum.

Grafton Street, aðalverslunargata borgarinnar, er ómissandi viðkomustaður allra þeirra sem leggja leið til sína til Dublinar. Það er samdóma álit margra arkitekta að gatan sé á meðal þeirra best heppnuðustu í gjörvallri Evrópu. Verslanirnar á götunni eru af öllum toga og á götunni er frábær blanda alþjóðlegra vörumerkja og minni verslana sem innfæddir reka. Síðan er tilvalið að koma við í Dundrum-verslunarmiðstöðinni, sem er ein sú stærsta sinnar tegundar í Dublin.

Af öðrum áhugaverðum stöðum borgarinnar sem sannarlega er vert að heimsækja má nefna Dublinarkastalann, sem felur í sér mikla og merkilega norræna víkingasögu, og Þjóðminjasafnið (National Museum of Ireland), þar sem fræðast má um sögu Íra frá örófi alda. Þá er einnig virkilega skemmtilegt að heimsækja höfuðstöðvar Guinnes bjórsins hjá St. Jame´s Gata, þar sem finna má glæsilegt safn auk þess sem gestir fá að sjálfsögðu að bragða á ölinu dökka.

Skoðunarferðir í Dublin

Borgarferð.  Föstudaga: 6. & 20.apríl
Þægileg og skemmtileg hálfsdagsferð um borgina. Lagt af stað frá hótelum um kl. 9:30 og komið til baka um kl. 13:00.
Verð: 4.300 krónur
Innifalið: Akstur og íslensk fararstjórn.

Írskt skemmtikvöld. Laugardagskvöld 7.apríl og föstudagskvöld 20.apríl
Frábært skemmtikvöld með írskum mat, líflegri tónlist og steppdansi þar sem afbragðs dansarar fara á kostum í hinum skemmtilegum steppdönsum,  sem gjarnan eru kenndir við „Riverdance“.
Verð: 6.400  krónur
Innifalið:  Kvöldverður, þriggja rétta máltíð og "show"

Þorp og bæir.  Sunnudaga: 8 & 22.apríl
Heilsdagsferð þar sem þorp og bæir í nágrenni Dublinar verða heimsóttir.
Lagt af stað frá hótelum um kl. 9:30 og komið til baka um kl. 17:00.*
Verð: 5.200 krónur
Innifalið: Akstur og íslensk fararstjórn.

Athugið að lágmarksþátttaka í skoðunarferðir eru 20 manns. Ferðin verður felld niður náist sú þátttaka ekki.

Ferðirnar eru bókanlegar á heimasíðu Vita, www.vita.is

(+)Til baka