Héðinn Svarfdal Björnsson

Héðinn Svarfdal Björnsson fæddist á Akureyri árið 1974 en ólst upp að mestu í Bandaríkjunum. Héðinn er menntaður félagssálfræðingur og vann á Englandi og í Kína áður en hann flutti aftur heim til Íslands, en síðan þá hefur hann starfað sem verkefnisstjóri á Lýðheilsustöð og svo hjá Embætti landlæknis. Hann dundar einnig við ritstörf og árið 2006 vann hann Íslensku barnabókaverðlaunin fyrir bókina Háski og hundakjöt, en hún fjallar um strák sem fer í ferðalag til Kína með föður sínum. Héðinn rekur fyrirtæki sem framleiðir kennsluefni á tölvutæku formi og einnig tekur hann að sér námskeiðahald og kennslu ýmis konar. Í gegnum tíðina hefur Héðinn tekið að sér margar ferðir til ýmissa landa sem fararstjóri, m.a. Englands, Skotlands, Eistlands, Lettlands og Karabíahafsins, en oftast hefur hann farið með hópa til Kína (& Tíbet). Hann er giftur með tvö börn.